Ég ætla að fá núðlusúpu, vatnssopa og fullan tank af bensíni fyrir launin mín !

Þetta er alveg ótrúlegt hvað það er dýrt að lifa á þessu landi. Mér þykir þetta orðið hálf fyndið hvað þjóðfélagsleg vandamál eins og verðbólga og gengishækkanir geta haft mikil áhrif á allt hjá okkur þegar verðin eru að hækka en ekki þegar þau lækka. T.d. hefur krónan veikst uppá síðkastið eftir mikinn styrk og hagvöxt hérna heima og samt virtust verð fara hækkandi á meðan ef eitthvað var. Síðan kom á daginn að krónan féll og gengishækkanir áttu sér stað sem í kjölfarið valda því að áðan las ég á mbl.is að verð á bifreiðum skyldu hækka um 3-9%. Af hverju sá ég aldrei neina frétt sem sagði að eftir óvenju gott gengi krónunnar myndu verð á bifreiðum og jafnvel matvöru lækka. Eða er þetta ekki nógu krassandi frétta efni ?
 Ég veit það eitt að ég hugsa mikið til brandarans sem ég heyrði í æsku um hafnfirðinginn sem var spurður um hvað honum findist um bensínhækkanirnar. Hann var fljótur að svara því... “Þær skipta mig engu máli því ég tek alltaf bara bensín fyrir 2.000,- kr.”
 Í alvöru talað finnst mér þetta ekki hægt hvað bensínið er orðið dýrt. 126,1 kr. pr. líterinn þegar ég fór á bensínstöð í dag og ekki ætlar það að skána. Ég er ekki gamall en ég man samt eftir að fara á Olís þegar stórt skilti sagði mér að 92. oktana bensín kostaði 64 kr. pr. líterinn. Varla getur 22. ára drengur talist það gamall að þetta sé í einhverri fortíð. Þegar ég fékk bílpróf görguðu allir yfir að bensínið var komið í 80 – 90 kr. Í dag fæ ég tankinn fyrir 6.000 kr. Ég get næstum keypt tvö strætókort fyrir fullan tank af bensíni.
 Svo er það fyndna í þessu öllu saman að ríkið tekur meirihlutann af verðinu. Það var spekingur sem birti á heimasíðunni sinni útreikningana sem ég vildi svo vel til að lesa og þar fann hann út að ríkið tekur 56% af hverjum seldum lítra m.v. virðisaukaskatt og bensínálagningu. Mér finnst bara einhvernvegin eins og skatturinn og ríkið sitji um budduna mína hvert sem ég fer.
 Nú legg ég til að við förum öll uppí Toyota umboðið, kaupum okkur Yaris og keyrum sparakstur með 4. l eyðslu á 100 km. Stríðum ríkinu og pössum peningana.
 Kveðja
Helgi Þór